الوصف
يوميات ساندي وجيمي – يوميات ساندي وچيمي هي يوميات كوميدية متصلة منفصلة بين زوجين جمال او چيمي وفكرية اللي بتحاول تبقى ساندي، باختصار الحدوتة حدوتة بيوت مصرية كتير.. بتحكي عن ستات الطبقة المتوسطة اللي نفسها تعيش دور هوانم جاردن سيتي لكن الطبع غلاب..
ساندي متجوزة جمال من عشر سنين وعندهم ٤ عيال.. شكري ٩ سنين ونعناعة ٧ سنين” “وعايدة ٤ سنين” “وناير عنده سنة”.. ساندي ست غيورة وطيبة ونكدية وقفيشة وبتحاول تبقى جميلة.. نفسها عيالها يبقوا زي ولاد الناس الهاي ويقولوا “مامي”.. بتحب تشوف برامج وقنوات الطبخ اللي فيها البروكلي والروزماري، صحيح هي متعرفش ايه هو الروزماري بس برضه بتحب تتفرج.. الجميل بقى انها بتأكله يا تونة يا كشري من الشارع.. كمان ساندي ست مصرية بتموت في اللت والعجن والنميمة في الأفراح ومبيعجبهاش العجب، مكياجها كتير وبتاخد وقت طويل وهي بتلبس العيال.. نفسها تعيش الحياة الرومانسية مع جوزها ويجيبلها ورد ودباديب في عيد ميلادها وفي الفالانتاين.. إنما هو راجل حياته كلها شغل وأكل وماتشات.. زوجين زي معظم الازواج المصرية بيروحوا المصيف وبيتسوقوا في كارفور وبيتفسحوا في جنينة الحيوانات.. الحلقات بتتطرق لقضية التحرش وساندي هتموت وحد يتحرش بيها.. كمان الحلقات ناقشت علاقة الست بحماتها والمفارقات الكوميدية اللي بتحصل لما الحماة بتزور مرات ابنها.. ساندي بتحب الموضة موووووت وبتعشق استايل هوانم زمان ونفسها الزمن يرجع بيها لورا.. ويا سلام لو عندها آلة الزمن عشان تروح تعيش في الزمن ده!!
ساندي بتكدب كتير عشان تكلفت چيمي وتاخد منه فلوس.. بتحب بيتها وبيطلع عينها في المذاكرة مع العيال زي كل ام مصرية نفسها ولادها يبقوا أحسن ناس.. بتغير على چيمي من عفاف اللي معاه في الشغل.. هي عمرها ما شافتها بس بتسمع عنها كتير.. سمعت عن الدايت مجرد سماع بس مش اكتر لكن عمرها ما فكرت ما تستمر عليه اكتر من ساعة وتلت..
چيمي بقى كائن أكول بيعشق الأكل بس مش بينوبه من الاكل غير الكشري.. بيحب الاهلي ونفسه ينطلق مع أصحابه لكن ساندي طابقة على نفسه طول الوقت.. وهو زي كل الرجالة بيحب الستات وبيعمل شات ع الفيسبوك بس ساندي مش سهلة وكل مرة تقفشه..الحلقات مواقفها كتير ومش بتخلص لأنها ببساطة بتحكي حياة كلنا عايشين ها.
